दक्षिण भारतीय फिल्मकी 'आइटम क्विन' सिल्क स्मिताका जीवनका दश तथ्यहरु

आश्विन १३, २०७७

दक्षिण भारतीय अभिनेत्री सिल्क स्मिता यस्तो एक्लो अभिनेत्री थिईन् जसको नाम मात्रले पनि थुप्रै फिल्महरुले सफलता हासिल गरेका थिए । सन् १९६०, डिसेम्बर २ मा जन्मिएकी सिल्कले केवल १७ वर्षको उमेरमा आफ्नो फिल्मी करियर शुरु गरेकी थिईन् । उनको खास नाम विजयलक्ष्मी थियो तर उनी सिल्क स्मिताको नामले चर्चित भईन् । उनले ४ सय भन्दा बढी फिल्ममा अभिनय गरेकी छिन् ।

सन् १९९६, सेप्टेम्बर २३ मा उनी आफ्नै घरमा पंखामा झुण्डीरहेको अवस्थामा भेटिएकी थिईन् । उनको जीवनीमा आधारित भएर ३ वटा फिल्महरु बनिसकेका छन् तर उनका जीवनका थुप्रै किस्साहरु पर्दामा देखिएका छैनन् । चर्चा गरौ त्यस्तै केहि किस्साहरु बारे -  

गरिबीका कारण पढाई छोड्नु परेको

सिल्कको जन्म एक गरिब तेलुगु परिवारमा भएको थियो । उनका आमा-बुबा अनेक दु:ख कष्ट सहेर परिवारको पालन पोषण गर्दथे । अलिक ठुली भएपछि सिल्कलाई सरकारी स्कुलमा भर्ना गरियो ताकी केहि ज्ञान हासिल गरुन् । तर ४ कक्षामा हुँदा उनले पढाई छोड्नु पर्यो । उनका बुबा-आमाले पढाउन पुग्ने पैसा कमाउन सकेका थिएनन् । फर्किएर सिल्कले घरायसी काम सम्हाल्न पर्यो । त्यतिबेला सिल्क केवल १० वर्षकी थिईन् ।

सानो उमेरमै विवाह

सिल्क उमेरमा सानी थिईन् तर हेर्दा ठुली । समय भन्दा अघिनै उनको शारीरिक विकास यस्तो भयो की उनका बाबु आमानै अचम्मित थिए ।उमेर कम थियो र बुद्धि विवेक पनि त्यहि अनुसारको थियो । उनको शारीरिक विकासको कारण उनका बाबु-आमा सोच्न बाध्य भए र उनको विवाह गरिदिने सोचे र निकै सानो उमेरमा सिल्कको विवाह एक मजदुर युवकसंग गरिदिए । यसरी उनका बाबु-आमाले आफ्नो टाउकोको बोझ हल्का गरे ।

खराब व्यवहारका कारण छोडिन् घर

जुन घरमा सिल्क विवाह गरेर गईन् त्यहाँ पनि उनिसंग राम्रो व्यवहार हुदैनथ्यो । पति जड्याहा थिए । रक्सि खाएर उनि सिल्कलाई पिट्ने गर्थे । कहिले काहिँ उनका देवर र नन्द पनि उनलाई पिट्ने गर्थे । त्यहाँ उनलाई बुझ्ने कोहि पनि थिएनन् त्यसैले उनले घर सम्हाल्न सकिनन् । त्यसपछि उनी घर छोडेर सिधै चेन्नई पुगिन् । त्यहाँ उनले एक दक्षिण भारतीय अभिनेत्रीको घरमा नोकरको काम शुरु गरिन् । सिल्क बाल्यकाल देखिनै फिल्मको शौकिन थिईन् । मौका मिल्ना साथ उनी आफ्नो दुनियाँबाट हराएर फिल्मको दुनियाँमा पुग्ने गर्थिन् । अभिनेत्रीको घरमा उनले नोकरको काम गरिन्, किनकि उनको इच्छा फिल्ममा काम गर्ने थियो ।

भव्य गाडी देखेर मन बदलियो

सिल्कले घरको काम सानै देखि गरेकी थिईन् त्यसैले उनले अभिनेत्रीको घरको काम पनि खुबै राम्रोसंग सम्हालिन् । बिस्तारै उनले अभिनेत्रीको व्यक्तिगत कामहरुमा पनि सहयोग गर्न शुरु गरिन् । उनले अभिनेत्रीको मेकअप गरेर उनलाई तयार बनाउने पनि गर्न थालिन् । यहाँ काम गर्दा सिल्कलाई अर्को फाइदा पनि भएको थियो । उनले ती अभिनेत्रीलाई भेट्न आउने निर्माता तथा निर्देशकहरु संग पनि चिनजान गर्न थालेकी थिईन् । एक दिन एक चर्चित फिल्म निर्माताको गाडी देखेर सिल्क धेरै प्रभावित भईन् र टाढैबाट गाडीलाई नियाल्न थालिन् । त्यो देखेर उनकी मालिक्नीले व्यंग गर्दै 'यो ठुलो गाडी देखेर कहीं त्यसमा बस्ने सपना त देख्न थालिनस् ?' भनिन् । सिल्कलाई चित्त बुझेन, उनले भनिन् - 'एक दिन म यस्तै गाडीमा बस्नेछु र त्यो मेरो आफ्नै गाडी हुनेछ ।'

काम मिल्नासाथ बनिन् 'आईटम क्विन'

सिल्कले फिल्महरुको लागि अडिसन दिन शुरु गरिन् । उनी अभिनयको स्कुल गएकी थिईनन् न कतै अभिनय सिकेकीनै थिईन् । अडिसन दिँदा दिदै उनले केहि कुराहरु सिक्दै जान थालिन् । एक फिल्मको अडिसनमा उनले देखाएको कामुक अदाका कारण उनले आईटम डान्स गर्ने अवसर पाईन् । उनको अदाले काम गर्यो र बिस्तारै बिस्तारै उनले फिल्महरुमा आइटम डान्स गर्ने अवसर पाउन थालिन् । केहि समयमा नै सिल्क आफ्नो समयको दक्षिण भारतीय फिल्महरुक 'आईटम क्विन' बनिन् । उनको आकर्षण यति तिब्र गतिमा बढीरहेको थियो की एउटा फिल्मलाई हिट बनाउनको लागि उनको डान्सनै काफी थियो ।

एक गीतको लागि ५० हजार लिन्थीन्

त्यसो त सिल्कलाई थुप्रै फिल्महरुमा देखिसकिएको थियो तर सन् १९८० मा आएको तमिल फिल्म 'वंडीचक्रम' ले दर्शकहरु बीच सिल्कको एक अलग पहिचान बनाइदियो । यस फिल्ममा उनी एक रक्सि ब्यापारीको चरित्रमा देखिएकी थिईन् । यसैबाट सिल्कले करियरमा ठुलो छलांग मारिन् र उनी आइटम डान्सको लागि दक्षिण भारतीय फिल्ममा काम गर्ने निर्माता/निर्देशकहरुको पहिलो रोजाई बन्न पुगिन् । त्यस समय सिल्क निर्माताहरु संग एक गीतको ५० हजार सम्म लिने गर्थिन् ।

सन् १९८९ मा 'वंडीचक्रम' को हिन्दि रिमेक पनि बन्यो जसको टाइटल 'प्रेम प्रतिज्ञा' थियो । रिमेकमा मिथुन चक्रवर्ती र माधुरी दीक्षित मुख्य भूमिकामा देखिएका थिए ।

४ वर्षमा करिब २०० फिल्ममा काम

एक आइटम गीतको लागि सिल्कको पारिश्रमिक धेरै भएता पनि निर्माताहरु सधै तयार नै हुन्थे । उनीहरुलाई थाहा थियो की सिल्कको एक आइटम डान्सले मात्र पनि फिल्म हिट हुन सक्छ । सिल्कको नाम दिन प्रतिदिन चर्चित हुदै थियो । यसैको कारणले फिल्म उद्योगमा पाइला टेकेको ४ वर्षमा नै उनले करिब २०० फिल्ममा काम गरिन् । अब उनको नाम आइटम डान्समा मात्र सिमित थिएन । उनले फिल्ममा केहि छोटा-छोटा र कहिले कहीं ठुलै भूमिकामा पनि काम गर्न थालेकी थिईन् । तमिल फिल्म उद्योगमा कमल हसन र रजनीकान्तसंग सिल्कले धेरै कामहरु गरिन् ।

फिल्मको कथाको रंगनै बदलिदिईन्

सन् १९८३ मा आएको हिन्दि फिल्म 'सदमा' बाट सिल्कले हिन्दि फिल्म उद्योगमा कदम राखिन् । यस फिल्ममा उनको उपस्थिति अनिवार्य जस्तै मानिएको थियो । यो फिल्म सन् १९८२ को तमिल फिल्म 'मुन्दरम पिराई' को रिमेक थियो । फिल्मका निर्देशक बालू महेन्द्रलाई फिल्मको कथा एकदमै सुस्त लागेको थियो । उनी यसमा तडक भडक मिसाउन चाहन्थे जसका लागि उनले फिल्मका मुख्य कलाकारहरु कमल हसन र श्रीदेवी बीच केहि बोल्ड दृश्य खिच्ने विचार गरेका थिए । तर यो सम्भव भएन र विकल्पमा उनले फिल्ममा सिल्क स्मितालाई लिए । सिल्कले फिल्मको दु:खपूर्ण कथामा पनि रंग भरिदिईन् ।

रक्सिको नशामा परेर ज्यान फालिन्

सयौं फिल्महरुमा काम गरिसकेपछि उनको करियर ओरालो लाग्ने क्रममा थियो । खासमा दर्शकहरु उनको एकै किसिमको कामबाट दिक्दार भईसकेका थिए । त्यसपछि उनले अभिनय छोडेर फिल्म निर्माणमा हात हालिन् । यसैबीच उनले एक डक्टरसंग विवाह पनि गरिन्, जसको मद्दतमा उनले फिल्महरु निर्माण गर्न थालिन् । तर जसरि दर्शकहरुले उनलाई अस्विकार गरेका थिए त्यसरीनै उनले बनाएका फिल्महरुमा पनि कुनै दम थिएन । आफ्नो करियर देखेर सिल्क अत्यन्तै निराश बनिन् र उनले सबैसंग दुरी बढाएर रक्सिको नशामा मात्र डुब्न थालिन् ।सन् १९९६, सेप्टेम्बर २३ मा उनी आफ्नै घरमा पंखामा झुण्डीरहेकी भेटिइन् । प्रहरीको छानबिनमा उनको मृत्युलाई आत्महत्याको नाम दिईयो र केस बन्द गरियो । 

सिलको जीवनमाथि बने तीन फिल्महरु

सन् २०११ मा एकता कपूरले सिल्कको जीवनमा आधारित फिल्म 'द डर्टी पिक्चर' निर्माण गरिन् । यस फिल्मलाई मिलन लुथरियाले निर्देशन गरेका थिए भने सिल्कको भूमिकामा अभिनेत्री विद्या बालनले अभिनय गरेकी थिईन् । यो फिल्म सिल्कका भाई वी. नागवारालाई मन परेन र उनले यो फिल्म सिल्कको जीवनीमा आधारित नभएको बताए । त्यसपछि कन्नड भाषामा 'डर्टी पिक्चर - सिल्क सकत हट' नामको फिल्म बन्यो । यस फिल्ममा सिल्कको भूमिकामा पाकिस्तानी अभिनेत्री वीना मालिक देखिईन् । मलायलम भाषामा पनि 'क्लाइम्याक्स' नामको फिल्म बनाइयो जहाँ सिल्कको भूमिका साना खानले निर्वाह गरेकी थिईन् ।

(स्रोत : अमर उजाला)

CopyRight |All Rights Reserved